noormohamed المشرفة العامة
| موضوع: علي سلامة .. شاعر العامية المصرية . الخميس أبريل 02, 2009 3:49 pm | |
| خايف أصحى مالاقيش مصر
ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر
خايف يوم أصحي
وأفتح الشباك
مالاقيش مصر
ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت
تعبت
إتخنقت
أصلنا زودناها
أكننا استعمرناها
ورثناها
مصر البنوتة الحلوة
اللي زي القمر
بقت عجوزة وشايبة
وبان عليها الكبر
خايف يوم أصحي
وأفتح الشباك
مالاقيش مصر
| |
|
noormohamed المشرفة العامة
| موضوع: رد: علي سلامة .. شاعر العامية المصرية . الخميس أبريل 02, 2009 3:51 pm | |
| أحب العسل
احب العسل
واموت فى الكسل
ووقت الازمه اقول فى العشق
حكمه ومثل
وبس خلاص ..
اهجص الاقى ميت مليون هجاص
افكر...... هس.... ولا صوت ولا ناس
لأنى كده ثقافة وعلم
يدوب فى الفيلم فى الكراس
وراسى زى اكبر راس
مفيش احلام مفيش احساس
| |
|
noormohamed المشرفة العامة
| موضوع: رد: علي سلامة .. شاعر العامية المصرية . الخميس أبريل 02, 2009 3:53 pm | |
| استراحة ع الصحاوي
استراحة ع الصحراوي
الجو نار
سايق ومحدش معايا
غيري انا والذكريات
وحبه حاجات
ازازه الميه
ونظره عينيا
اللي شايفها في المرايا
بتبص لي من وقت للتاني بغباء
كأنها عارفة الحكاية
او واخده بالها من الطريق
مر السفر من غير صديق
اول شمال احود ولف
الغنوه سكتت
والشريط عمال يسف
وازاي تخف
يا ألم من غير جراحة
ادي استراحة
دماغي محتاجة الصراحة
وقلبي محتاج الحنان
اركن هنا
اشرب يا عم قهوتك
ويلا عشان
نلحق مكان قبل الغروب
واوعي الردار يسحب
ف لحظة غنوتك
معدش فاضل في الطريق
ولا استراحة | |
|
noormohamed المشرفة العامة
| موضوع: رد: علي سلامة .. شاعر العامية المصرية . الخميس أبريل 02, 2009 3:55 pm | |
| وأحنا لسة في إبتدائي
وإحنا لسه في إبتدائي
وسط اوراقى القديمة
اللى لسه منها باقي
شوفت صورتى بين زميلى
و احنا لسه فى إبتدائي
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقي
هو صاحبى
لما كان فى الدنيا صاحب
اما دول كانوا جيرانى
كل واحد فينا حقق
جزء من بعض الأمانى
أما دى الشاطرة البليدة
العنيدة أم الضفاير
تبقى حبى الأولانى
أد ايه حزنت عليها
لما راحت فصل تانى
ما احنا كنا تختة واحدة
فى تانية تالت
مره قلت
و هى قالت
لما مدت ايدها شالت
دمعة وقعت غصب عنى
جوه كراسة الحساب
كنا لسه صفحة بيضة فى الكتاب
الوشوش كانت بسيطة
طاهرة لكن مش عبيطة
نرسم الأحلام خريطة
فى قلبها نقطة تلاقى
واحنا لسه فى أبتدائي
| |
|
noormohamed المشرفة العامة
| موضوع: رد: علي سلامة .. شاعر العامية المصرية . الخميس أبريل 02, 2009 3:58 pm | |
| ميـــــــدان الجــيـــزة
ضيعت شوية سنين كده
بحب من بعيد لبعيد
والحكاية مقضياني
ومبسوط وراضي وسعيد
أفرح بأي حاجة
وأستني هدوم العيد
و بعدين ضيعت شوية سنين
نفسي أبقي أشطر واحد في الكيميا
مع إني مش فاهم ميدان الجيزة
والحياة رغم قسوتها
شايفها لذيذة
وضيعت شوية سنين بقي
نفسي أعدي أختبارات الكورة
في النادي الأهلي
وأشتغل في وكالة ناسا
وأبقي واحد م العلماء المهمين
و بعدين ضيعت شوية سنين
منتهي أملي كرسي فاضي
في أتوبيس تلات خمسات
عين الصيرة أم المصريين
وضيعت شوية سنين
عايز أفهم الفرق
بين النكسة والهزيمة
والأحترام وقلة القيمة
و أبقي نجم سيما
م المشهورين
وبعدين ضيعت شوية سنين
واقف عند نظرية المؤامرة
لا عارف أعيش ف الزمالك
ولا راضي أعيش ف غمرة
ومش عارف ليه
الحشيش ممنوع
مدام مصرحين بالخمرة
وياتري بقي أتجوز
واحدة بيضة ولا سمرة
ولا أسأل فيها
رجال الفتوي والدين
وضيعت شوية سنين
مركز ف السيراميك
والبيبان والشبابيك
وألوان الحيطان
وده بيج وده سن فيل
والموضة الأصفر
قشر الموزة
وضيعت شوية سنين
لا انا بحر ولا نيل
حاجة كده بعيد عنك
ملهاش عوزة
ولما بقيت كام وخمسين
لقيتني لسة
بحب من بعيد لبعيد
وبرضة مش فاهم
ميدان الجيزة | |
|
mostafagad المدير العام
| موضوع: رد: علي سلامة .. شاعر العامية المصرية . الأحد أبريل 05, 2009 1:02 am | |
| جميل يانور على سلامة من الناس اللى بحبهم | |
|
noormohamed المشرفة العامة
| موضوع: رد: علي سلامة .. شاعر العامية المصرية . الأربعاء سبتمبر 16, 2009 8:32 pm | |
| الجميل هو مرورك يا مصطفى شكرا لك | |
|